Rumtreiber - Sunndachmorje Lyrics

Sunndachmorje, jraad ehts hallve aach
Janz unsanft wis du waach, wat wor dat en Naat
Dich zupf jätt am Uhr, e Hängsche klopp op dinge Kopp
Du riehß die Oure op un sühs dinge Stropp
Un du denks bei dir: Is et nit schön - widder Sunndachmorje!

Du quäls dich us em Bett, et hätt jo doch keine Zweck
Du söcks, ävver verjeblich, ding Frau die es weg
Du weeß nit woröm un ad ja nit wohin
Dann schötts du dir zuiehrs ens ene Kaffee erin
Un du denks bei dir: Is et nit schön - widder Sunndachmorje!

Is et nit herrlich, widder Sunndach ze han
Die janze Woch maloch, hück bes du ens dran
Un alles wat du wills, es dinge Fridde un e kleij bessje Rouh
Doch dä Kleen, dä do vür dir in singem Stölche drin sitz
Mit sing Teddybär-Oure dich freundlich anblitz
Dä strahlt Dich ahn un hätt sing janz eijene Meinung do zo

Dann hüürs du us de Köch ne brutale Raudau
Wat do passiert es, weeß du noch nit jenau
Dä Köhlschrank es leer, dä Boddem dofüür voll
Sieh Schnüssje beschmiert un er fingk dat noch toll
Un du denks bei dir: Is et nit schön - widder Sunndachmorje!

Is et nit herrlich, widder Sunndach ze han
Die janze Woch maloch, hück bes du ens dran
Un alles wat du wills, es dinge Fridde un e kleij bessje Rouh
Doch dä Kleen, dä do vür dir om Köcheboddom sitz
Mit sing Teddybär-Oure dich freundlich anblitz
Dä strahlt Dich ahn un hätt sing janz eijene Meinung do zo

Die Stunde verjonn, un et hüürt einfach nit op
Dä kleene Rabauke hätt et hück wirklich drop
Doch öm kurt no sibbe es et dann esu wick
Denn och Sunndachsovends es Schlofejonszick
Un du denks bei dir: Is et nit schön - endlich Sunndachovend!

Dä Daach is am Engk, un du bis et och
Un dä Kleen litt mem Köppche jetzt bei dir om Buch
Die Öjelche kleen, du nemms en huh on brängs en innet Bett
Un wie er jetz do in singem Schlofanzuch litt
Un wie jeden Ovend sieh "Joot-Naat-Bützje" kritt
Do denks du bei dir, dat wor ne Daach, dä nit schöner sin kunnt
Un o denks du bei dir, dat wor ne Daach, dä nit schöner sin kunnt