IZIRAN - Inig n tmara Lyrics

Leḥzen deffir leḥzen
D acu akka k-yuɣen ?
Ay ul-iw susem
Fiḥel, fiḥel imeṭṭawen
D kečč i yextaren
Lɣerba nekcem

Nerwel neǧǧa-kem a tamurt
A tamurt i aɣ-d-irebban
Neǧǧa alqim di terbut
Nerwel neǧǧa imawlan
Neǧǧa taḥeddurt
Zzit d iniɣman
Neǧǧa tazemmurt
Yuli-tt usennan
Nbeddel tamurt
Nɛella deg yigenwan

Nerwel neǧǧa tiɣaltin
Idurar akked iɣallen
Newweḍ anda ur nessin
Nedder am igujilen
Iseggasen ttɛeddin
Qqimen-d waktayen
Nhuba tuɣalin
Nuɣal d iminigen
Am yirgazen am tlawin
Neǧǧa-kem dayen

Nerwel neǧǧa-k ay akal
Ay akal i aɣ-d-yessekren
Deffir waɣrum nettazzal
Alarmi kkawen ifadden
Neqqar kan mazal
Xas rɣan wulawen
Akud yettɣawal
Ur t-qḍiɛen iḍarren
Terǧiḍ-aɣ acḥal
Neɛgez ad n-uɣalen

A Tamurt-iw ɛzizen
Icedhant wallen
Mazal ḥemmleɣ-kem

Yid-m bḍaneɣ wussan
Yal wa anda t-yenher wasif
Ulawen-nneɣ d imuḍan
Anda nedda nesḥissif
Nettergu imawlan
Nesber kan bessif
Ass kan iɛeddan
Aɣ-d-yawi aɣilif
Tamurt i aɣ-d-yeǧǧan
Neǧǧa-tt teṛwa lḥif

Fahim MESƐUDEN
IZIRAN