English 362 - O very lord o love o god alas Lyrics

And now my pen alas wyth wyche I wryte
quaketh for drede off that I muste endyte

___

O very lord o love o god alas
That knowest best myn hert and all my thowght
what shall my sorowful lyfe donne in thys caas
Iff I forgo that I so dere haue bowght
Syns ye [_____] and me have fully brought [5]
Into your grace and both our hertes sealed
howe may ye suffer alas yt be repealed

What I may doo I shall whyle I may dure
or lyue in torment and in curel payne
Thys infortune or thys dysaventure [10]
alone as I was borne I wyl complayne
ne neuer wyl I sene yt shyne or rayne
but ende I wyl as edyppe in derknesse
my sorowful lyfe and so dy in dystresse

O wery goste that errest to and fro [15]
why wyld thow not flye owt off the wofullest
Body that euer myght on grounde go
a soule lurkyng in thys woful nest
flye forth owt my herte and yt breste
and folowe alwaye [_____] thy lady dere [20]
they ryght place ys nowe no lenger here

O ye louers that hygh vpon the whele
ben sette of fortune in good aventure
god grawnte that ye fynden aye loue of stele
and longe maye yowr lyfe in ioye endure [25]
but when ye comen by my sepulture
remembre that yowr felowe resteth there
for I louyd eke thowgh I vnworthy were.